[七週六天] 產前檢查 • 私家 • 1

6 JUN 2013 • WEEK7 DAY6 • 葉承楷醫生 • CRL: 1.43cm

[四週] 時發現有左，除左去睇普通科醫生拎懷孕證明
一直等到 [七週] 先第一次做產前檢查
因為幾位媽媽級都話咁早未必照到心跳
我又好大安旨意咁覺得木木一定好乖咁著床係子宮裡面...
而且都要些少時間搵個好的婦產科醫生 =]

但係點搵呢? 網上評價又信唔過
自己去問人，一定俾人反問「你有左啦?」
好苦惱...

係未決定政府/私家生的時候
又要諗定個醫生係邊間私家醫院掛單
又要諗下方唔方便貴唔貴好唔好人...

煩呢~ (我知，呢個只係煩的開端...)


聽左媽媽級意見，最後決定揀兩個係早孕期睇下比較下~

-----------------------------------------------------------------------------------------------------

第一次去產檢，好緊張呢~
謝謝bubu主動請假陪我去，仲陪我試左ramen champion
好麻麻...浪費晒我的外食quota! (日日食住家飯，外食好珍貴XD)

葉承楷醫生，仁安醫院駐診醫生
預約左係尖沙咀翹康睇，方便放工去唔駛入大圍
[六週] 時打去預約，姑娘都話太早，建議 [七週] 先照
姑娘好好人，檔期亦易就，第一印象幾好

去到首先做登記，磅重，姑娘提醒飲多少少水，膀胱漲容易照
跟住我就拎左診所有的媽媽會入會表格
準備開turbo填的時候...姑娘叫名!!! 
唔係要等個幾兩個鐘架咩?

無預到咁快有得見，我水都未飲過一啖，勁擔心乜都照唔到...
bubu仲呢hea，玩到唔見左電話，入左房都要出返去搵電話...

一開始醫生就話傾下計，問下家族病歷，期間講左好多次「恭喜晒」=]
之後姑娘帶我入去，準備照超聲波
我又唔知un un要退到幾落，要姑娘幫手，醜死怪 =p
姑娘唧完一大篤暖暖地的gel，醫生就入黎啦

醫生一擺個機頭係我肚肚上面，已經即刻見到一大粒腰果 (胎囊)
腰果底有一團黑影，就係木木啦!
好緊張問醫生有無心跳，醫生就指住閃閃下的地方
呢個就係傳聞中的「閃閃」啦!
再問醫生有無宮外孕，醫生就照個子宮俾我睇
自己都睇到粒腰果係子宮入面~
我剩係識問呢兩樣，醫生就幫我照埋其他位置，會唔會有纖維瘤之類
最後度埋CRL (crown-rump length) - 頭臀長度，1.43cm，8WK0D
比預期仲大左一日，木木好努力咁長大啊~



醫生再講解左日常要補充咩營養，之後有咩檢查要做
仲話政府有得做就省返唔駛去私家做(!)
然後已經問我有無其他問題...葉醫生你唔問我搵唔搵你生?
要自己問醫生先肯講仁安收費同佢的醫生費，仲叫我慢慢考慮唔駛急(!)
我呢啲預產期無咩人生仔咁話喎 (係唔係架...)
一個唔太hardsell的醫生，幾nice，有問必答(但唔算太詳細)，幾好丫~

出返去，唔好忘記要繼續填媽媽會表格，填到俾埋錢都仲未填完...
交返表格俾姑娘，姑娘就俾左呢堆野我



好似搞到我一定係生仔咁!
一個鐘內搞掂，超快，返屋企nap埋都未到放工時間 =]